Уус Дьиэтэ - Болугур нэһилиэгэ

2023 сыл алтынньы 3 күнүгэр Амма улууһун Болугур нэһилиэгин норуотун маастара, Степан Прокопьевич Устинов уолунаан Ильялыын нэһилиэнньэҕэ диэн анаан киэҥ-куоҥ Уус дьиэтин үөрүүлээх быһыыга-майгыга нэһилиэгин олохтоохторун уонна ыҥырыылаах ыалдыттарын ортотугар аста.Ыҥырыыны ылынан улуус депутаттарын сэбиэтин председателэ.В.В.Колосов,улуустааҕы кииннэммит бухгалтерия салайааччыта Р.А.Алексеев,нэһилиэк баһылыга А.Н.Петров,култуура салалтатыттан фонда специалиһа О.Н.Судинова,Ф.Потапов аатынан норуот айымньытын ойуулуур-дьүһүннүүр салаатын Сыккыс уонна Оһуор уһуйар түмсүүлэр сал.Д.И.Иванова,улуус нэһилиэктэриттэн уустар уонна уран тарбахтаах маастардар кэлэн бүгүҥҥү үөрүүлээх тэрээһиҥҥэ активнай кыттыыны ыллылар.Үөрүүлээх тэрээһини олохтоох алгысчыт В.У.Тимофеев аал уотун аһатан сиэри-туому ситэрэн саҕалаата.Ол кэнниттэн Уус дьиэтин иһигэр киирэн билистибит,үлэлиир усулуобуйаларын көрдүбүт-иһиттибит.

Степан Прокопьевич Устинов уолунаан Илья Степановичтыын, төрөөбүт нэһилиэгэр сөбүлээн дьарыктанар дьарыгын өссө кэҥэтэн,кэлин үйэлээх дьарыкпыт нэһилиэнньэ туһатыгар,эдэр көлүөнэ дьон салгыы уһаналларыгар,үүнэн-сайдан иһэригэр диэн 2 сыл анараа өттүгэр социальнай контракт көмөтүнэн,оттон быйыл «Президентский фонд культурных инициатив” конкурска кыттан гран ылан, онно бэйэлэрин харчыларын эбэннэр, бу Уус дьиэтин толору үлэлиир усулуобуйатын оҥорон астылар

Үөрүүлээх күҥҥэ сөп түбэһиннэрэн программаҕа тэрийээччилэр,бастаан ыалдьыттарын үгэскэ кубулуппут сиэрдэринэн, сынньалаҥ пааркатыгар Болугур нэһилиэгин Ытык маһыгар илдьэн,сиэр-туом быһыытынан алаадьынан күндүлэтэн сүгүрүйүүнү Степан Прокопьевич оҥоттордо,оттон эһиилги Олонхо ыһыаҕар бэлэмнээн сайын ыытыллыбыт мас уустарын икки ардыларыгар өрөспүүбүлүкэ күрэҕэр оҥоһуллубут Олонхо геройун уобарастарын маһынан кыһан оҥорбут оҥоһуктарын,күһүҥҥү айылҕа устун хаамтара сылдьан пааркаҕа турарын көрдөрөн экскурсиялатта ,оттон салгыы Л.Е.Филиппова аатын сүгэр Болугур орто оскуолатын музейыгар нэһилиэк олоҕун-дьаһаҕын көрдөрөр бэртээхэй информацияны оскуола орто сүһүөх оҕолоро уонна музей сал.С.Ю.Кожурова кэпсээнинэн ситэрилиннэ.

Эбиэт кэннэ мустубут улуус уустарын уонна уран тарбахтаах маастардарын кытта ,минньигэс үүттээх чэйи иһэ-иһэ төгүрүк остуол тула олорон, үлэ-хамнас туһунан ырытыһыы,киэҥ ис хоһоонноох, кэлэр сылга ыытыллар Олонхо ыһыаҕын тула санаа үллэстиилээх кэпсэтии буолла.

Түмүккэ мустубут бары ыалдьыттар уонна тимир уустара бэйэлэрин санааларын буолаары турар Олонхо ыһыаҕар үчүгэй бэлэмнээх,нэһилиэнньэ ортотугар өйдөтүү үлэ барыахтааҕын,эрдэттэн оҥоһуллар үлэлэр,ыытыллар күрэхтэр туга-кимэ чопчу ыйыллан толорулларын,бу толоруллар үлэлэр үбүнэн-харчынан өйөбүллээх буолалларыгар уонна кэмиттэн кэмигэр үлэ туолуута хонтуруолланарын ыйдылар.Ордук тимир уустара эдэр ыччат ортотугар үлэ барыахтааҕын,кинилэри интириэстииргэ ханнык тэрээһиннэр барыахтарын сөбүн эттилэр,саца аһыллыбыт Уус дьиэтэ атын нэһилиэктэргэ холобур буолан,нэһилиэк аайы маннык Уус дьиэлэрин сөргүтэрбит буоллар үйэлээх үлэлэр үйэ-саас тухары хаалан үйэттэн-үйэҕэ эдэр көлүөнэ быстыспат ситимэ буолуо этэ диэн баҕа санааларын эттилэр.

Информацияны суруйда Амма улууһун культура уонна норуот айымньытын салалтатын фондаҕа специалиһа Судинова О.Н.