"Дьулуур" драматическай театр 30 сыллаах үбүлүөйүэ

С.Я. Левин аатынан Бөтүҥнээҕи норуот айымньытын киинигэр "Дьулуур" драматическай театр 30 сыллаах үбүлүөйүн үөрүүлээхтик көрүстэ. Бу күн олохтоох суруйааччы И.Н. Корякин-Уйбаан Бөтүүнүскэй айымньытынан "Сэрии сылын оҕолоро", уонна Тимофей Сметанин "Атын киһи оҕото" пьесатынан испиктээктэр көһүннүлэр.

Бөтүҥ драматическай театр 30 сыллаах үбүлүөйүнэн СӨ норуотун айымньытын дьиэтин отдел начальнига Алексей Захаров, Амма улууһун баһылыгын социальнай үлэҕэ солбуйааччы Ньургуйаана Илларионова, култуура управлениетын салайааччы Иван Иванов, киин библиотека ситимин салайааччы Евдокия Сутакова, Бөтүҥ нэһилиэгин баһылыга Алексей Никитин, С.Я. Левин аатынан норуот айымньытын киинин директора Анна Яковлева эҕэрдэлэрин тиэртилэр, наҕараадаларын туттардылар. Олор ортолоругар Уйбаан Бөтүүнүскэйгэ "Амма киэн туттуута" бэлиэ туттарылынна.

Театр үлэтин көрүү хамыыһыйатыгар бэрэссэдээтэлинэн СӨ норуотун айымньытын дьиэтин отдел начальнига Алексей Захаров, хамыыһыйа чилиэннэринэн Артем Корякин уонна Иван Иванов үлэлээтилэр.

Хамыыһыйа бэрэссэдээтэлэ "Дьулуур" театры уруккаттан бэлиэтии көрөрүн бар дьон иннигэр аһаҕастык бэлиэтээтэ. Онон инникитин Бөтүҥ драматическай театра норуодунай ааты сүгүө диэн эрэннэрдэ.