Валентина Васильевна Стручкова "Айар кутум иэйиитэ" персональнай быыстапката үөрүүлээхтик аһылыыта

Алтынньы 16 күнүгэр Дьокуускай куоракка Өксөкүлээх Өлөксөй аатынан норуоттар доҕордоһууларын дьиэтин "Симэх" галереятыгар биһиги биир дойдулаахпыт, норуот маастара, Болугур уонна Амма нэһилиэктэрин бочуоттаах олохтооҕо, Валентина Васильевна Стручкова "Айар кутум иэйиитэ" диэн персональнай быыстапката үөрүүлээхтик аһылынна. Быыстапка сэтинньи 5 күнүгэр диэри турар. Быыстапкаҕа биир дойдулаахтарбыт, куорат олохтоохторо, биллэр маастардар кыттыыны ыллылар. Амма түмсүүттэн (сал. Кузьмин А.Н.) Захарова А.С., бэйэтин тойугунан биир дойдулаахпыт, Олонхо театрын артыыската Күннэй Николаева эҕэрдэлээн истиҥ тылларын эттилэр. Ийэлэргэ анаан Надежда Алексеева иэйиилээх ырыатын бэлэхтээтэ.

Быыстапка аалай лиэнтэтин «Симэх» галерея директора Яна Игнатьева, Николай Гоголев - Сатал Уус уонна Валентина Стручкова быстылар. Үөрүүлээх күнүнэн төрөөбүт Болугуруттан нэһилиэк баһылыга А.Н. Петров, М.А. Ноговицын аатынан култуура кииниттэн Е.В. Платонова, улуустааҕы култуура салалтатыттан фонда специалиһа О.Н. Судинова, «Симэх» галерея директора Я.В. Игнатьева, «Амма» биир дойдулаахтарбыт түмсүүтүн аатыттан А.С. Захарова уонна аймахтара, табаарыстара элбэх киһи үөрүүтүн үллэстэн эҕэрдэлээтилэр. Бэлэхтэри, тыыннаах сибэккинэн симээтилэр, баҕа санааларын, элбэх үтүө тыллары эттилэр. Быыстапкаҕа 70-ча киһи сырытта, Валентина Васильевна 30 сыл айбыт-туппут баайыынан, быысабайынан оҥортообут үлэлэрин сэҥээрэ-астына көрдүлэр, баҕа санааларын, бэйэлэрин этиилэрин маастарга анаан суруйан хааллардылар.